اصعب حب

أصعب حب،

 لما تكون بتحب بجد، واللي بتحبه من مصلحته مايحبكش

ماهي مش مشكلته، إنك حبيته، وعارف انك ليه ماتنفعش

تبدأ بسكوتك، تداري خوفك، علشان حبك ليه مايبنش

وتشيله بقلبك، وكل همك، تخليه دايما ما يحسكش

وتشيله من بالك، تلاقيه بخيالك، ساكن بعقلك مابيتحركش

تشتاق تشوفه، أو تسمع صوته، تخلص حججك ولا تنجحش

ولما عيونك، تشتاق لعيونه، نفسك تشوفها بشرط، مايلمحكش

ووقت غيرتك، يتقطع قلبك، تلف وشك، وتعمل فيها مابيهمكش

ولما عقلك، يلوم على قلبك، يقوله اهدى شوية بقى وماتتهورش

يرد قلبك، تعيش بحيرتك، مش بايدي، على بعده والله أنا ماقدرش

وقتها تعرف، سجنت نفسك، بسجن حبك، ومنه ماهتتحررش